عمران خان کا ’جیل بھرو تحریک‘ بدھ کو لاہور سےشروع کرنے کا اعلان

Reading Time: < 1 minute

پاکستان تحریک انصاف کے چیئرمین عمران خان نے بدھ کو جیل بھرو تحریک کے آغاز کا اعلان کیا ہے.

عمران خان نے جمعے کو اپنے ویڈیو خطاب کے دوران کہا کہ ’ہم 22 فروری کو لاہور سے جیل بھرو تحریک کا آغاز کر رہے ہیں۔‘

انہوں نے کہا کہ ’اس کے اگلے روز ملک کے تمام بڑے بڑے شہروں میں یہ تحریک چلائیں گے۔‘

قبل ازیں بدھ کو اپنی گرفتاری کے حوالے سے بات کرتے ہوئے عمران خان نے کہا تھا کہ جیل بھرو تحریک پر حکمت عملی اگلے 48 گھنٹوں میں سامنے آ جائے گی۔

ان کا کہنا تھا کہ ’جب گرفتاریاں شروع ہوں گی تو میں گرفتاری دے دوں گا۔ جب ملک میں آئین کی خلاف ورزی ہوتی ہے تو عدالتوں کے علاوہ کوئی اور راستہ نہیں ہوتا۔‘

عمران خان نے چند دن پہلے پنجاب اور خیبرپختونخوا اسمبلی کے انتخابات 90 روز کے اندر نہ کرانے کی صورت میں جیل بھرو تحریک شروع کرنے کا اعلان کیا تھا۔