عمران خان تین عدالتوں میں پیش، تمام مقدمات میں ضمانت منظور
Reading Time: < 1 minuteاسلام آباد کی ہائیکورٹ، انسداد دہشتگری اور بینکنگ عدالتوں نے اقدام قتل، کار سرکار میں مداخلت اور ممنوعہ فنڈنگ کے مقدمات میں سابق وزیراعظم عمران خان کی عبوری ضمانتیں منظور کر لی ہیں۔
دوسری جانب ڈسٹرکٹ اینڈ سیشن کورٹ نےتوشہ خانہ فوجداری کیس میں عمران خان کے وارنٹ گرفتاری جاری کیے ہیں.
ہائیکورٹ کےچیف جسٹس عامر فاروق نے اقدام قتل کے مقدمے میں عمران خان کی عبوری ضمانت کی درخواست کی سماعت کی.
منگل کو اسلام آباد کے جوڈیشل کمپلیکس میں الیکشن کمیشن کے فیصلے کے خلاف احتجاج کے دوران کار سرکار میں مداخلت کے مقدمے میں عمران خان ذاتی طور پر پیش ہوئے۔
اُن کے ہمراہ کارکنوں کی ایک بڑی تعداد بھی تھی جن کے دھکم پیل میں کمپلیکس کا دروازہ ٹوٹ گیا۔
اسلام آباد پولیس کے ترجمان کے مطابق جوڈیشل کمپلیکس میں توڑ پھوڑ کرنے والوں کے خلاف کارروائی عمل میں لائی جائے گی۔
اسلام آباد پولیس کے ترجمان نے بتایا کہ ’جوڈیشل کمپلیکس میں داخل ہونے والوں کے خلاف مقدمہ درج کیا جا رہا ہے۔ سرکاری املاک کو نقصان پہنچانے والوں کو کارروائی کا سامنا کرنا ہوگا۔‘
ترجمان کے مطابق ’احاطہ عدالت سے جن افراد نے دروازہ کھولنے میں معاونت کی ان کے خلاف بھی کارروائی ہو گی۔ سی سی ٹی وی کیمروں سے شناخت عمل میں لائی جا رہی ہے۔‘
