گدھوں کی مانگ میں اضافہ

پڑوسی ملک چین میں گدھوں کی مانگ میں اضافہ ہوگیا ہے جس کے بعد خیبر پختونخوا کی حکومت نے  اضافی گدھے چین کو برآمد کرنے کا فیصلہ کیا ہے معاہدے کی شرائط رواں ماہ چین میں منعقد ہونے والے روڈ شو میں طے کی جائیں گی۔ خیبر پختونخوا حکومت کی طرف سے پاک چین راہداری منصوبے کے لیے خصوصی طورپر بنائی گئی ویب سائٹ پر جاری ایک بیان میں کہا گیا ہے کہ حکومت کی طرف سے گدھوں کی افزائش کے لیے خصوصی انتظامات کئے جائیں گے اور اس سلسلے میں جدید ٹیکنالوجی کا استعمال کیا جائے گا۔ بیان میں کہا گیا ہے کہ پاکستان میں گدھوں کا شمار ایسے جانوروں میں ہوتا ہے جنھیں کوئی خاص اہمیت نہیں دی جاتی لیکن چین میں اس کی بڑی مانگ ہے کیونکہ اس کے چمڑے کو وہاں اہم ادویات میں استعمال کیا جاتا ہے۔ صوبائی حکومت کے مطابق اس منصوبے کے تحت نہ صرف لوگوں کو روزگار کے مواقع ملیں گے بلکہ جانوروں کی افزائش کےلیے خصوصی فارمز بھی قائم کیے جائیں گے۔ سماجی رابطوں کی ویب سائٹس فیس بک اور ٹوئٹر پر اس فیصلے پر لوگوں کی جانب سے طرح طرح کے مذاق سامنے آ رہے ہیں۔