ہارورڈ یونیورسٹی کی درخواست پر عبوری حکم، جج نے صدر ٹرمپ کو روک دیا
امریکہ میں ایک وفاقی جج نے ایک عبوری حکمنامے کے ذریعے ٹرمپ انتظامیہ کو ہارورڈ یونیورسٹی کی بین الاقوامی طلباء کے اندراج کی اہلیت کو منسوخ کرنے سے روک دیا ہے۔
ہارورڈ یونیورسٹی نے جمعے کو ٹرمپ انتظامیہ کے خلاف مقدمہ دائر کرتے ہوئے الزام لگایا کہ یہ اقدام "پہلی ترمیم، ڈیو پروسیس کلز، اور ایڈمنسٹریٹو پروسیجر ایکٹ کی صریح خلاف ورزی ہے۔”
امریکی ڈسٹرکٹ جج ایلیسن ڈی بروز نے حکم امتناع جاری کرتے ہوئے عملدرآمد روکنے کا حکم دیا اور منگل کی صبح سماعت مقرر کی۔
ٹرمپ انتظامیہ نے جمعرات کو کہا کہ ہارورڈ نے سٹوڈنٹ اینڈ ایکسچینج وزٹرز پروگرام (جو غیر شہریوں کو ایک مخصوص ویزے کے تحت یونیورسٹی میں تعلیم حاصل کرنے کی اجازت دیتا ہے) استعمال کرنے کی اپنی صلاحیت کھو دی ہے کیونکہ اس نے طلبا ویزا رکھنے والوں کے بارے میں معلومات فراہم کرنے کے لیے گزشتہ ماہ بھیجے گئے مطالبات کی تعمیل نہیں کی تھی۔
حکومت نے یونیورسٹی کو لکھتے ہوئے الزامات عائد کیے تھے کہ ”محکمہ ہوم لینڈ سیکیورٹی کو متعلقہ معلومات فراہم کرنے کے لیے متعدد درخواستوں کی تعمیل کرنے سے آپ کے انکار کے نتیجے میں کیمپس کے ایک غیرمحفوظ ماحول کو برقرار رکھتے ہوئے جو کہ یہودی طلباء کے لیے مخالف ہے، حماس کی حمایت اور ہمدردی کو فروغ دیتا ہے، اور نسل پرست ‘تنوع، مساوات اور شمولیت’ کی پالیسیوں کو بروئے کار لاتا ہے۔“
