بول نیوز کو بند کردیا گیا

پاکستان الیکٹرانک میڈیا ریگولیٹری اتھارٹی نے بول نیوز اور اس کے تفریحی چینل بول انٹرٹینمنٹ کو بند کرنے کا حکم جاری کیاہے۔ بول انٹرٹینمنٹ آج کل پاک نیوز کے نام سے نشریات جاری رکھے ہوئے تھا۔ پیمرا کی جانب سے جاری پریس ریلیز کے مطابق وزارت داخلہ نے میسرز لبیک پرائیویٹ کے ڈائریکٹرز شعیب شیخ،عائشہ شعیب، وقاص عتیق اور ثروت بشیر کی سیکورٹی کلیرنس مسترد کردی ہے جس کے بعد اس کمپنی کے لائسنس پر چلنے والے دونوں ٹی وی چینل کی نشریات فوری طورپر روکنے کا حکم جاری کیا گیا ہے۔ فیصلے کی منظوری پیمرا اتھارٹی کے اجلاس میں دی گئی۔ پیمرا کا کہناہے کہ اس حوالے سے تمام متعلقہ اداروں کو احکامات جاری کردیے گئے ہیں۔