پینتیس کروڑ ساٹھ لاکھ کا چینل

آڈیٹر جنرل پاکستان کی رپورٹ میں انکشاف کیا گیا ہے کہ سرکار کے پاس ایک ایسا ٹی وی چینل بھی ہے جو قومی خزانے کو سالانہ دس کروڑ سے زائد میں پڑ رہا ہے۔
پارلیمان میں پیش کی گئی آڈیٹر جنرل کی رپورٹ کے مطابق انتیس جنوری دوہزار تیرہ کو سابق صدر آصف زرداری نے انگریزی زبان میں نشریات کیلئے پی ٹی وی ورلڈ کا افتتاح کیا، اس دن سے لے کر تیس جون دوہزار پندرہ تک اس چینل پر قومی خزانے سے پینتیس کروڑ اکسٹھ لاکھ روپے خرچ ہو چکے ہیں۔ آڈٹ رپورٹ کے مطابق اس چینل کی کمائی آج بھی ایک روپیہ نہیں ہے۔ سرکاری خزانے سے پی ٹی وی ورلڈ کو سالانہ ایک سو پانچ ملین روپے یعنی دس کروڑ سے زائد کے فنڈز جاری کیے جاتے ہیں اورحکام کہتے ہیں کہ اس کے بغیر چینل کی نشریات جاری رکھنا ممکن نہیں ہے۔
آڈیٹر جنرل نے اپنی رپورٹ میں اعتراض کیاہے کہ اس چینل کا قیام متعلقہ اتھارٹی کی منظوری کے بغیر کیا گیا اور اس کیلئے قانونی ضابطے پورے نہیں کیے گئے۔ اسی طرح اس چینل کو فنڈز کا اجراء بھی کسی اتھارٹی کی منظوری کے بغیر کیا جا رہا ہے۔