وزیراعلی پنجاب کے پاس سمری پڑی رہتی ہے

Reading Time: < 1 minute

سپریم کورٹ نے وفاقی حکومت سے نئی گج ڈیم کی تعمیر کا ٹائم شیڈول طلب کیا ہے ۔ وفاقی وزیر پلاننگ اینڈ ڈویلپمنٹ نے عدالت کو بتایا ہے کہ سندھ حکومت کو منچھر جھیل کی وجہ سے منصوبے پر تحفظات ہیں ۔

نئی گج ڈیم کی تعمیر کیلئے لئے گئے ازخود نوٹس کیس کی سماعت چیف جسٹس کی سربراہی میں تین رکنی بنچ نے کی ۔ وفاقی وزراء خسرو بختیار اور فیصل واوڈا پیش ہوئے ۔ چیف جسٹس نے کہا کہ آپ سب کو افتتاح کرنے کی جلدی ہوتی ہے، ہمیں ڈیم کی تعمیر کا ٹائم فریم دے دیں ۔

خسرو بختیار نے عدالت کو بتایا کہ آبی وسائل کو خاص اہمیت دے رہے ہیں، بھاشا، مہمند ڈیم بھی ہماری ترجیحات میں شامل ہیں ۔ وفاقی وزیر پلاننگ اینڈ ڈویلپمنٹ نے بتایا کہ سندھ حکومت کو منچھر جھیل کی وجہ سے منصوبے پر تحفظات ہیں ۔

چیف جسٹس نے کہا کہ اگر عدالت مداخلت نہ کرے تو معاملات التوا کا شکار ہو جاتے ہیں، پنجاب میں بہت معاملات میں سمری وزیراعلیٰ پنجاب کے پاس پڑی رہتی ہے، وزیراعلی پنجاب پاس بہت سی سمریز ایسی ہیں جو دو گھنٹے بھی نہیں رکنی چاہئیں ۔

خسرو بختیار نے بتایا کہ نئی گج ڈیم کیلئے وزرات خزانہ اور وزارت پانی و بجلی سے رابطہ کر رہے ہیں ۔ چیف جسٹس نے کہا کہ کابینہ ہوتی کس لیے ہے، آپ اپنے ساتھی وزیر سے براہ راست بات کر سکتے ہیں، پانی اور صحت کے معاملات میں التوا برداشت نہیں کیا جائے گا، تمام سٹیک ہولڈرز کو ساتھ لے کر چلیں، بیوروکریسی کی وجہ سے معاملہ التوا کا شکار نہ ہو ۔