عہدے سے ہٹائے جانے کے دس ماہ بعد بھی افتخار درانی وزرا کالونی کے بنگلے میں رہائش پذیر

پاکستان کے وزیراعظم عمران خان کی جماعت سے وابستہ افتخار درانی سرکاری عہدے سے ہٹائے جانے کے تقریبا دس ماہ بعد بھی وفاقی وزرا کی کالونی (منسٹرز انکلیو) کے ایک بنگلے میں اہلخانہ کے ہمراہ رہائش پذیر ہیں۔

دسمبر 2019 میں افتخار درانی کو وزیراعظم عمران خان نے میڈیا امور سے متعلق اپنے خصوصی معاون کے عہدے سے ہٹا دیا تھا اور ان کا نام وفاقی کابینہ کے اجلاس میں شرکت کرنے والوں کی فہرست سے بھی نکال دیا گیا تھا۔

اُس وقت افتخار درانی کا موقف تھا کہ ان کو عہدے سے ہٹانے جانے کی وجوہات کا علم نہیں۔ بعد ازاں انہوں نے سرکاری حیثیت سے استعفیٰ دینے کا اعلان کیا جو رواں برس فروری میں باقاعدہ طور پر منظور کر لیا گیا۔

افتخار درانی کا کہنا تھا کہ ان کے لیے سرکاری عہدے حیثیت نہیں رکھتے اور وہ تحریک انصاف کے کارکن کی حیثیت سے کام جاری رکھیں گے تاہم وہ تاحال سرکاری رہائش گاہ خالی کرنے سے انکاری ہیں۔

یاد رہے کہ افتخار درانی کو میڈیا امور سے متعلق معاون خصوصی کے عہدے سے ہٹائے جانے سے ایک ماہ قبل وزیراعظم عمران خان کے میڈیا سے متعلق ایک اور مشیر یوسف بیگ مرزا نے بھی عہدے سے استعفیٰ دیا تھا۔

خیال رہے کہ پاکستان کی وفاقی کابینہ 50 سے زائد وزیروں، مشیروں اور معاونین خصوصی پر مشتمل ہے جن میں سے زیادہ تر غیر منتخب ہیں۔