پٹرول کی سمگلنگ اور فروخت سات دن میں بند کرنے کی وارننگ

پاکستان کے وفاقی وزیر برائے داخلہ شیخ رشید احمد نے ملک بھر میں سمگلنگ کا پٹرول فروخت کرنے پر پابندی کا اعلان کرتے ہوئے کہا ہے کہ سات روز کا وقت دیتا ہوں کہ سمگلنگ کے پٹرول کی فروخت بند روک دی جائے اگر ایسا نہ ہوا تو متعلقہ پٹرول پمپس مکمل بند کر دئیے جائیں گے۔

بدھ کو اسلام آباد کے سی ڈی اے ہیڈ کوارٹرز میں کرسمس کی تقریب میں شرکت کے موقع پر وفاقی وزیر داخلہ نے کہا کہ حلف اٹھانے کے بعد وزیراعظم کی ہدایت پر یہ اعلان کرتا ہوں کہ پورے ملک میں سمگلنگ کا پٹرول فروخت کرنے پر پابندی عائد کر دی گئی ہے، سمگلنگ پر قابو پایا گیا ہے، تمام چیف سیکریٹریز کو ہدایت کر دی گئی ہے کہ وہ چیکنگ کریں اور سمگلنگ کے پٹرول کی فروخت کو روکیں۔

انہوں نے کہا کہ سمگلنگ کے پٹرول میں پانی ملا کر فروخت کیا جا رہا ہے جس سے گاڑیاں بھی تباہ ہو رہی ہیں۔

ان کا کہنا تھا کہ اگر کوئی سمگلنگ کا پٹرول آئندہ کسی پٹرول پر فروخت کرتے ہوئے پکڑا گیا تو اس کا یہ کاروبار ہمیشہ کے لیے بند کر دیا جائے گا۔