معیشت تباہ کرنے والے سری لنکن صدر ملک سے فرار ، ایمرجنسی نافذ

Reading Time: < 1 minute

ملکی معیشت کو تباہ کرنے والے سری لنکا کے صدر فرار ہو کر مالدیپ چلے گئے۔

بدھ کو حکام نے تصدیق کی کہ شدید معاشی بحران اور احتجاج کے دوران سری لنکن صدر گوتابایا راجا پکشے ملک چھوڑ گئے ہیں امیگریشن حکام نے ان کے مالدیپ پہنچ جانے کی تصدیق کی ہے۔

خبر رساں ادارے روئٹرز کے مطابق ملک چھوڑنے سے چند گھنٹے قبل انہوں نے استعفٰی دینے کا فیصلہ بھی کیا تھا۔

امیگریشن حکام نے روئٹرز کو بتایا کہ راجا پکشے اپنی اہلیہ اور دو باڈی گارڈز کے ہمراہ ایئرفورس کے جہاز میں ملک سے نکلے۔

حکومت کے اہم ذرائع اور راجا پکشے کے قریبی ساتھی کا کہنا ہے کہ وہ اس وقت مالدیپ کے دارالحکومت میل میں ہیں۔

حکومتی ذرائع کا کہنا ہے کہ زیادہ امکان یہی ہے کہ راجا پکشے وہاں سے کسی اور ایشیائی ملک منتقل ہو جائیں گے۔

امیگریشن حکام کے مطابق وہ قوانین کے مطابق صدر کو ملک چھوڑنے سے روک نہیں سکتے تھے۔

گذشتہ ہفتے ہزاروں کی تعداد میں مظاہرین کے وزیراعظم ہاؤس میں گھسنے کے بعد راجا پکاسا نے مستعفی ہونے کا فیصلہ کیا تھا۔

رپورٹ کے مطابق صدر کو جمعے کے بعد سے کسی ملک میں کہیں دکھائی نہیں دیے تھے۔

سری لنکن پارلیمنٹ کے سپیکر مہندا یپا ابے وردنا کے قریبی ذرائع کا کہنا ہے کہ ان کا ابھی تک راجا پکشے سے رابطہ نہیں ہوا ، جبکہ راجا پکشے کے قریبی ذرائع کہتے ہیں کہ انہوں نے بدھ کو اپنا استعفٰی سپیکر کو بھجوا دیا تھا۔

اسی طرح وزیراعظم رانیل وکرما سنگھے بھی استعفٰی دینے کی پیشکش کی ہے، سری لنکن آئین کے بعد اس صورت میں نئے صدر کے انتخاب تک سپیکر کو قائم مقام صدر بنایا جائے گا۔