افغانستان میں طالبان کا یومِ آزادی، ترقی پسند افغانوں کی مخالف مہم

اقتدار میں واپسی کا ایک سال مکمل ہونے کے بعد افغانستان میں طالبان نے ملک بھر میں عام تعطیل کا اعلان کیا ہے۔

سوشل میڈیا پر دنیا بھر میں مقیم طالبان مخالف ترقی پسند افغان شہری اپنے ملک کی حالت پر غمزدہ ہیں اور اس کا اظہار جنگجوؤں پر نفرت انگیز تبصروں کے ساتھ کر رہے ہیں۔

خبر رساں ایجنسی اے ایف پی کے مطابق افغانستان اس وقت بدترین معاشی بدحالی سے گزر رہا ہے اور مسائل سے دوچار ملک میں خواتین کے حقوق کچل دیے گئے جبکہ انسانی بحران مزید سنگین ہوتا گیا۔

ایک سال قبل امریکی حمایت یافتہ اشرف غنی کی حکومت کے خلاف کارروائیاں کرنے کے بعد سخت گیر اسلام پسندوں نے کابل پر قبضہ کر لیا تھا۔

گزشتہ برس 15 اگست کو اس وقت کے صدر اشرف غنی کے ملک سے فرار ہونے کے چند گھنٹے بعد کابل میں داخل ہونے والے ایک جنگجو نعمت اللہ حکمت کا کہنا ہے کہ ’ہم نے جہاد کی ذمہ داری پوری کی اور ملک کو آزاد کرایا۔‘

غیرملکی افواج کا افراتفری میں انخلا 31 اگست 2021 تک جاری رہا۔ لاکھوں افراد اس امید کے ساتھ کابل کے ایئرپورٹ پر پہنچے تھے کہ کسی بھی پرواز سے ملک سے باہر چلے جائیں گے۔

اُس وقت ایئرپورٹ پر انسانی ہجوم دیکھا گیا۔ان میں ایسے افراد بھی شامل تھے جنہوں نے چلتے ہوئے امریکی کارگو جہاز سے لٹکنے کی کوشش کی اور ان کے گرنے کی خبریں دنیا بھر میں نشر ہوئیں۔

طالبان حکام نے ابھی تک سرکاری سطح پر تقریبات کا اعلان نہیں کیا تاہم سرکاری ٹیلی ویژن پر خصوصی پروگرامز نشر کیے جائیں گے۔

طالبان جنگجوؤں نے اس بات پر خوشی کا اظہار کیا ہے کہ ان کی تحریک اب اقتدار میں ہے۔