اگلے جمعے 23 دسمبر کو پنجاب اور خیبر پختونخوا کی اسمبلی تحلیل کرنے کا اعلان

پاکستان میں اپوزیشن جماعت تحریک انصاف کے چیئرمین عمران خان نے کہا ہے کہ جن دو صوبوں میں ان کی حکومت ہے وہاں 23 دسمبر کو اسمبلیاں تحلیل کر دی جائیں گی.

’ہم نے فیصلہ کیا ہے کہ اگلے جمعے کو دونوں اسمبلیاں تحلیل کر دیں گے۔‘

سنیچر کو لاہور میں اپنی رہائش گاہ زمان پارک میں پنجاب کے وزیراعلیٰ پرویز الہی اور وزیراعلیٰ خیبر پختونخوا محمود خان کو ساتھ بٹھا کر ویڈیو لنک کے ذریعے لبرٹی چوک میں پی ٹی آئی کے جلسے سے خطاب کرتے ہوئے عمران خان نے کہا کہ ’اس کے علاوہ ہم سپیکر نیشنل اسمبلی کے سامنے جا کر کہیں گے کہ ہمارے استعفے منظور کرو۔‘

عمران خان نے کہا کہ ان کی حکومت کے خاتمے کے ذمہ دار سابق آرمی چیف جنرل قمر جاوید باجوہ تھے۔

’کون ذمہ دار تھا ایک چلتی ہوئی حکومت کو گھر بھیجنے کا۔ اس کا ایک آدمی ذمہ دار تھا اور وہ تھے جنرل باجوہ۔ میں اس لیے بات نہیں کرتا تھا کہ وہ آرمی چیف تھے اور ملک کی بدنامی نہ ہو۔ ہم چپ کر کے بیٹھے رہے۔‘

’ملک کا بچہ بچہ جانتا ہے کہ این آر او ون جنرل مشرف نے دیا اور این آر او ٹو جنرل باجوہ نے دیا۔‘

ان کا کہنا تھا کہ ’میں ان پاکستانیوں میں سے ہوں جن کا جینا مرنا پاکستان میں ہے۔ میں نے برطانیہ میں شادی کی۔ پاسپورٹ لے سکتا تھا، لیکن میں پاکستان میں رہا۔‘