زرداری اور شہباز شریف میں تنازع، نجم سیٹھی کا دستبرداری کا اعلان

پاکستان کرکٹ بورڈ کے سابق چیئرمین نجم سیٹھی نے کہا ہے کہ وہ آصف زرداری اور شہباز شریف کے درمیان تنازعے کی وجہ نہیں بننا چاہتے اس لیے خود کو پاکستان کرکٹ بورڈ کی چیئرمین شپ کی دوڑ سے باہر کرتے ہیں۔

منگل کی صُبح ایک ٹویٹ میں نجم سیٹھی نے لکھا کہ ’سب کو سلام! میں آصف زرداری اور شہباز شریف کے درمیان تنازع کی وجہ نہیں بننا چاہتا۔ ایسا عدم استحکام اور غیر یقینی صورتحال پاکستان کرکٹ بورڈ کے لیے اچھی نہیں۔‘

انہوں نے کہا کہ ’ان حالات میں میں پی سی بی کی چیئرمین شپ کا امیدوار نہیں ہوں۔ تمام سٹیک ہولڈرز کو گڈ لک۔‘

خیال رہے کہ سابق صدر آصف زرداری اتحادی حکومت کے آخری دنوں میں مختلف عہدوں پر اپنے من پسند لوگوں کو تعینات کرنا چاہتے ہیں اور اُن کی خواہش ہے کہ ذکا اشرف پی سی بی کے چیئرمین بنیں۔

اپنے اثاثوں کے اعتبار سے پاکستان کرکٹ بورڈ کو مالدار ترین خودمختار باڈی سمجھا جاتا ہے۔

شہباز شریف کی خواہش ہے کہ نجم سیٹھی ہی کرکٹ بورڈ کا انتظام سنبھالے رکھیں۔

دلچسپ بات یہ ہے کہ ماضی میں نجم سیٹھی پیپلز پارٹی کے زیادہ قریب رہے ہیں۔