’خوش آمدید‘ کا سائن بورڈ نصب کرنے پر افغان حکام ناراض، بارڈر بند کر دیا

پاکستان اور افغانستان کے درمیان اہم گزرگاہ طورخم بارڈر ایک بار پھر بند کردیا گیا ہے جس کے باعث شاہراہ پر تجارت اور ٹریفک کا نظام معطل ہے۔
ً
بارڈر حکام کے مطابق صوبہ خیبرپختونخوا کے ضلع خیبر میں واقع طورخم بارڈر کے قریب زیرو پوائنٹ پر ’خوش آمدید پاکستان‘ کا بورڈ نصب کیا جا رہا تھا جس پر افغان فورسز نے تنازع کھڑا کر دیا اور احتجاجاً بارڈر گیٹ بند کر دیا۔

بارڈر کی بندش کے باعث پیدل آمد و رفت متاثر ہونے کے علاوہ دونوں جانب گاڑیوں کی لمبی قطاریں لگ گئی ہیں جبکہ بارڈر پر کشیدگی کے خدشے کے باعث ٹرانزٹ ٹریڈ بھی معطل ہے۔

حکام کے مطابق گزشتہ روز 5 دسمبر کی شام سے طورخم بارڈر بند ہے جس سے دونوں جانب گاڑیوں کی آمد و رفت بھی معطل ہے۔
سرحدی حکام کے مطابق پیدل چلنے والے مسافروں کے لیے گیٹ کھلا ہوا ہے۔

ایک بارڈر اہلکار کا کہنا تھا کہ سرحد کھولنے سے متعلق پاکستانی سکیورٹی حکام اور افغان فورسز کی بات چیت جاری ہے تاکہ جلد سے جلد بارڈر کو کھولا جا سکے۔

دوسری جانب سرحد چیمبر آف کامرس نے بارڈر کی بندش پر تشویش کا اظہار کرتے ہوئے موقف اپنایا کہ آئے روز بارڈر کو بند کرنے سے دونوں طرف تجارت کو نقصان پہنچ رہا ہے۔

واضح رہے کہ حکومتِ پاکستان کی جانب سے افغان ڈرائیورز کے لیے پاسپورٹ اور ویزا کی شرط لازمی قرار دینے کے بعد 20 نومبر کو افغان فورسز نے تین دن کے لیے بارڈر بند کر دیا تھا.