محسن داوڑ عدالت میں پیش ہوگئے
پاکستان میں شمالی وزیرستان سے تعلق رکھنے والے قومی اسمبلی کے رکن محسن جاوید داوڑ کو بنوں کی انسداد دہشت گردی عدالت نے آٹھ روزہ جسمانی ریمانڈ پر حکام کے حوالے کیا ہے۔
اس سے قبل پاکستان میں فوج نے ذرائع سے ٹی وی چینلز کو خبر دی تھی کہ وزیرستان سے قومی اسمبلی کے پشتون رکن محسن داوڑ کو گرفتار کر لیا گیا ہے جبکہ دوسری جانب بنوں کے مقامی صحافیوں نے خبر دی ہے کہ محسن داوڑ قبائلی عمائدین کے ساتھ عدالت میں پیش ہوئے ہیں۔
خیال رہے کہ ان کے خلاف فوجی چیک پوسٹ پر حملے کا مقدمہ درج کیا گیا تھا۔
مقامی صحافی عدنان بھیٹنی نے ٹویٹ کیا ہے کہ قبائلی عمائدین نے انتظامیہ سے مذاکرات کے بعد دھرنا ختم کر دیا ہے۔
پاکستان کی فوج نے وزیرستان سے ہی قومی اسمبلی کے رکن علی وزیر کو چند روز قبل گرفتار کیا تھا اور وہ اس وقت محکمہ انسداد دہشت گردی کی تحویل میں ہیں۔
