فوجی ترجمان کی برنال

Reading Time: 2 minutes

پاکستان کی فوج کے ترجمان میجر جنرل آصف غفور نے اپنے ذاتی ٹوئٹر اکاؤنٹ سے وزیراعظم عمران خان کا دفاع کیا ہے جبکہ ان پر تنقید کرنے والوں کو جلن کم کرنے کے لیے برنال کے استعمال کا مشورہ دیا ہے۔

واضح رہے کہ مخالفین اور مختلف رائے رکھنے والوں کو برنال کے استعمال کا مشورہ یا نصیحت سب سے پہلے تحریک انصاف کے سوشل میڈیا ٹرولز نے شروع کی تھی۔

پاکستانی فوج کے ترجمان بظاہر اقوام متحدہ کے جنرل اسمبلی اجلاس میں عمران خان کی تقریر پر خوش تھے مگر سوشل میڈیا پر گل بخاری کی ایک ٹویٹ نے ان کو ناراض کر دیا۔

گل بخاری نے ڈی جی آئی ایس پی آر کی عمران خان کے خطاب کے بارے میں کی گئی پہلی ٹویٹس کی جانب اشارہ کرتے ہوئے کہا تھا کہ ”اسی لیے تو انہوں نے کہا تھا کہ عمران خان کا خطاب تاریخی ہوگا“

گل بخاری نے لکھا کہ دنیا کو اقوام متحدہ میں کھڑے ہو کر ایٹمی جنگ سے ڈرانے سے زیادہ اور کیا شے تاریخی ہو سکتی ہے اور بوائز نے وزیراعظم کو ایسا کرنے کے لیے کہا۔

ان کا کہنا تھا کہ اب شاید دنیا پاکستان سے ایٹمی ہتھیار ختم کرنے کے بارے میں فیصلہ کرے۔

خیال رہے کہ گل بخاری نے یہ ٹویٹ محمد تقی کی ٹویٹ پر لکھی تھی جن کا کہنا تھا کہ وزیراعظم عمران خان نے ایٹمی ہتھیاروں کے استعمال کے بارے میں وہی بات کی جو پاکستانی فوج کے ترجمان ٹویٹ میں کرتے ہیں۔

میجر جنرل آصف غفور نے گل بخاری کی ٹویٹ کا سکرین شاٹ پوسٹ کر کے لکھا کہ ”خیال ہے کہ وہاں برنال ختم نہیں ہوئی ہوگی۔ کوئی پاکستان برنال آپ تک پہنچا دے گا۔“

یاد رہے کہ تجزیہ کار اور سوشل میڈیا ایکٹیوسٹ گل بخاری کو گذشتہ برس لاہور میں اغوا کیے جانے کے بعد رہا کیا گیا تھا اور وہ آج کل بیرون ملک مقیم ہیں۔