پاکستان میں کورونا کے تشویشناک مریضوں کی تعداد میں ریکارڈ اضافہ

Reading Time: 2 minutes

پاکستان میں منصوبہ بندی کے وفاقی وزیر اسد عمر نے کہا ہے کہ برطانیہ سے آنے والی کورونا کی نئی قسم ملک میں تیزی سے پھیل رہی ہے، اگر صورت حال قابو میں نہ آئی تو پہلے سے سخت بندشیں لگائی جا سکتی ہیں۔

سنیچر کو اسلام آباد میں نیشنل کمانڈ اینڈ آپریشن سینٹر (این سی او سی) کے خصوصی اجلاس کے بعد نیوز بریفنگ میں اسد عمر نے کورونا کی پچھلی دو لہروں کا تیسری لہر سے موازنہ کرتے ہوئے بتایا کہ پہلی لہر میں ایک ساتھ زیادہ سے زیادہ 3300 مریض تشویشناک حالت میں تھے، جبکہ دوسری لہر میں یہ تعداد 2511 رہی تھی۔

انہوں نے بتایا کہ تیسری لہر میں گذشتہ روز تعداد 2842 تک پہنچ چکی ہے اور گزشتہ 12 روز کے دوران اس میں ایک ہزار سے زائد کا اضافہ ہوا۔

انہوں نے پڑوسی ممالک کا حوالہ دیتے ہوئے کہا کہ تیسری لہر پورے خطے میں نظر آ رہی ہے، انڈیا میں روزانہ کیسز کی تعدد 10 ہزار کے قریب تھی جو یکدم 47000 تک جا پہنچی ہے۔

اسد عمر کے مطابق دو ہفتے قبل کچھ پابندیاں عائد کی گئیں لیکن ان پر درست طور پر عمل نہیں ہوا۔

انہوں نے خبردار کرتے ہوئے کہا کہ ’اگر احتیاط نہ کی گئی تو خدانخواستہ ہم پہلی لہر سے بھی آگے نکل سکتے ہیں۔‘

انہوں نے عوام سے اپیل کی کہ زیادہ سے زیادہ احتیاط کریں اور اپنے ساتھ اپنے پیاروں کا خیال رکھیں۔

انہوں نے پاکستانیوں کے جذبے کو سراہتے ہوئے کہا کہ ’جب یہ کوئی فیصلہ کرتے ہیں تو پھر سب کچھ کر سکتے ہیں جیسا پہلی لہر کے دوران کیا گیا تھا۔‘

خیال رہے کہ پاکستان میں گزشتہ 24 گھنٹوں کے دوران کورونا کے چار ہزار 400 سے زائد نئے کیسز رپورٹ ہوئے جو گزشتہ سال جون کے بعد کی سب سے بڑی تعداد ہے۔