صدر عارف علوی اور وزیر دفاع پرویز خٹک کو بھی کورونا
پاکستان کے صدر عارف علوی اور وزیر دفاع پرویز خٹک کے کورونا ٹیسٹ مثبت آ گئے ہیں۔
پیر کی شام اپنے ٹوئٹر اکاؤنٹ سے صدر عارف علوی نے اطلاع دیتے ہوئے بتایا کہ ان کا کورونا ٹیسٹ مثبت آ گیا ہے جبکہ وزیر دفاع پرویز خٹک کے کورونا کا شکار ہونے کی خبر سندھ کے گورنر عمران اسماعیل نے ٹویٹ کرتے ہوئے دی۔
وازا مرضت فھوا یشفین
اور جب میں بیمار ہوتا ہوں تو وہی شفا دیتا ہے
I have tested positive for Covid-19. May Allah have mercy on all Covid affectees. Had 1st dose of vaccine، but antibodies start developing after 2nd dose that was due in a week. Please continue to be careful.
— Dr. Arif Alvi (@ArifAlvi) March 29, 2021
صدر علوی نے تمام کورونا مریضوں کی صحت یابی کے لیے دعا کرتے ہوئے عام لوگوں سے احتیاط کی اپیل کی ہے۔
صدر نے لکھا ہے کہ انہوں نے کورونا ویکسین کی پہلی خوراک لی ہے تاہم اینٹی باڈیز بننے کے لیے دوسری خوراک ضروری ہے جو دو ہفتے بعد لگے گی۔
سندھ کے گورنر عمران اسماعیل نے ٹویٹ کرتے ہوئے بتایا ہے کہ وزیر دفاع پرویز خٹک کورونا وائرس کا شکار ہو گئے ہیں۔
انہوں نے وزیر دفاع کے کورونا ٹیسٹ کی رپورٹ مثبت آنے کا لکھتے ہوئے ان کی صحت یابی کے لیے دعا کی۔
خیال رہے کہ پاکستان میں کورونا کی تیسری لہر میں شدت دیکھی جا رہی ہے اور وزیراعظم عمران خان اور ان کی اہلیہ بشریٰ بی بی بھی کورونا کا شکار ہوئے ہیں۔
