افغانستان میں 130 غریب خواتین کو فروخت کرنے والا گرفتار

Reading Time: < 1 minute

افغانستان پر کنٹرول رکھنے والے طالبان حکام نے ایک ایسے شخص کو گرفتار کرنے کا دعویٰ کیا ہے جس پر الزام ہے کہ اس نے 130 افغان خواتین کو کسی امیر آدمی سے شادی کا جھانسہ دے فروخت کیا۔

افغان ذرائع ابلاغ کے مطابق طالبان کے صوبائی پولیس چیف رحیم اللہ سراج نے بتایا کہ اس شخص کو شمالی صوبے جوزجان میں گرفتار کیا گیا۔

ان کا کہنا تھا کہ ’ابتدائی تفتیش کی ہے اور امید ہے اس کیس کے حوالے سے مزید تفصیلات سامنے آئیں گی۔‘

ضلعی پولیس چیف محمد سردار مباریز نے کہا کہ یہ شخص غریب خواتین کو سہانے سپنے دکھاتا تھا جو اپنے حالات سے تنگ تھیں۔
امیر آدمی سے شادی کے لیے وہ انہیں مختلف صوبوں میں لے کر جاتا تھا اور بعد میں انہیں فروخت کر دیتا تھا اور خریدار انہیں غلام بنا لیتے تھے۔
اس شخص پر الزام ہے کہ اس نے اس طریقے سے 130 خواتین کو فروخت کیا۔

افغانستان میں جرائم، اقربا پروری اور کرپشن نئی بات نہیں ہے، لیکن بڑھتی ہوئی غربت نے طالبان کی مشکلات میں اضافہ کیا ہے۔

تین ماہ قبل اقتدار میں آنے کے بعد طالبان بڑے شہروں میں ڈکیتی اور اغوا جیسے جرائم پر قابو پانے کی کوشش کر رہے ہیں۔

طالبان کی وزارت داخلہ نے کہا کہ محکمہ پاسپورٹ کے عملے سمیت 60 افراد کو پاسپورٹ حاصل کرنے کے لیے جعلی دستاویزات بناتے پکڑا گیا ہے۔

وزارت نے کہا کہ کابل میں پاسپورٹ آفس کو مرمت کے لیے عارضی طور پر بند کیا جا رہا ہے۔