بشری بی بی اور عمران خان کا نکاح، ٹرائل پر حکم امتناع خارج

Reading Time: 2 minutes

اسلام آباد ہائیکورٹ نے عمران خان اور بشریٰ بی بی کے دوران عدت نکاح کیس میں ناجائز تعلقات سے متعلق الزام خارج کر دیا جبکہ دوران عدت نکاح کے الزام پر کارروائی ٹرائل کورٹ کی صوابدید پر چھوڑتے ہوئے ٹرائل پر حکم امتناع خارج کر دیا۔

عدالت نے کہا ملزمان پر فردِ جرم عائد ہو چکی، ہائیکورٹ اب اس مرحلے پر ٹرائل میں مداخلت نہیں کر سکتی۔

اس سے قبل عدالت نے ٹرائل پر حکم امتناع جاری کرتے ہوئے ٹرائل کورٹ کو گواہوں کے بیانات ریکارڈ کرنے سے روک دیا تھا

‏اسلام آباد ہائیکورٹ کے چیف جسٹس عامر فاروق نے عمران خان اور بشری بی بی کی عدت میں نکاح کیس خارج کرنے کی درخواستیں نمٹا دیں۔

دوران سماعت پٹیشنرز کے وکیل سلمان اکرم راجہ نے کہا کہ یہ کیس درخواست گزاروں کی تذلیل کرنے کیلئے دائر کیا گیا۔سیاسی مقاصد کیلئے سکینڈلائز کرنے کیلئے نوٹسز جاری کرائے گئے۔ نکاح کے پانچ سال اور 11 ماہ بعد نومبر 2023 میں کمپلینٹ دائر کی گئی۔

چیف جسٹس نے کہا خاور مانیکا کا کیس ہے کہ انہوں نے بشری بی بی کو 14 نومبر کو طلاق دی، یکم جنوری کو نکاح ہوا تو درمیان میں 48 دن بنتے ہیں، سپریم کورٹ کا 39 دن عدت سے متعلق فیصلہ موجود ہے۔

خاور مانیکا اپنے وکیل راجہ رضوان عباسی کے ہمراہ عدالت میں پیش ہوئے۔ راجہ رضوان عباسی نے کہا شریعت کے مطابق عدت کا وقت 90دن ہے۔

چیف جسٹس نے کہا یہ کیسے ثابت ہو گا کہ یہ 39 دن ہیں یا 90 دن؟ وکیل نے کہا یہ شوہر اور پراسیکیوشن ثابت کریں گے۔

عدالت نے پوچھا کون سے شوہر، پہلے یا بعد والے؟

خاور مانیکا کے وکیل راجہ رضوان عباسی نے کہا جس کے ساتھ بشری بی بی 28 سال رہیں ،وہی بتائیں گے۔ اگر پہلا نکاح درست تھا تو پھر دوسرا نکاح کیوں کیا گیا؟ گواہوں نے ٹرائل کورٹ میں بیان دیا کہ دوسرے نکاح میں بھی موجود تھے۔ یہ کہتے ہیں کہ اپریل 2017 میں خاور مانیکا نے زبانی طلاق دی، خاور مانیکا کے پاس اگست کے شمالی علاقوں کے ٹور کی تصاویر موجود ہیں۔

چیف جسٹس نے استفسار کیا فرض کریں کہ آپ نے ثابت کر بھی دیا تو پھر اِس میں جرم کیا ہو گا؟
راجہ رضوان عباسی نے کہا اگر نکاح بےقاعدہ قرار پائے گا تو پھر وہ خلافِ قانون ہو گا۔

عدالت نے دلائل سننے کے بعد کچھ دیر کے لیے فیصلہ محفوظ کیا اور بعد میں عدالتی آبزرویشن کے ساتھ درخواستیں نمٹا دیں.