آپریشن ردالفساد میں فوج کا جانی نقصان

فوج کے شعبہ تعلقات عامہ نے ایک بیان میں کہا ہے کہ ملک بھر میں آپریشن ردالفساد کامیابی سے جاری ہے اور سیکورٹی فورسز نے سو سے زائد معصوم شہریوں کے قتل میں ملوث انتہائی مطلوب دہشتگرد کو ہلاک کر دیا ہے ۔ آئی ایس پی آر کے مطابق دہشتگرد کا تعلق لشکر جھنگوی سے تھا ۔

بیان میں کہا گیا ہے کہ سیکورٹی فورسز نے بلوچستان کے علاقے کلی الماس میں خفیہ اطلاعات پر آپریشن کیا اور آپریشن کے دوران لشکر جھنگوی بلوچستان کا سربراہ سلمان بادینی مارا گیا جبکہ شدید فائرنگ کے تبادلے میں کرنل سہیل عابد شہید اور چار جوان زخمی ہوئے ہیں ۔
فوج کے ترجمان کے بیان کے مطابق آپریشن میں دو خود کش بمباروں سمیت تین دہشتگر د مارے گئے ۔ فائرنگ میں جاں بحق ہونے والے کرنل سہیل عابد کی نماز جنازہ راولپنڈی میں ادا کی گئی اور ان کو پورے فوجی اعزاز کے ساتھ سپرد خاک کیا گیا ۔