بھانجیوں کا ریپ کرنے والے ماموں کو سزا

پاکستان میں پشتو زبان کی مشہور گلوکارہ نازیہ اقبال کے بھائی افتخار کو صوبہ پنجاب کے شہر راولپنڈی کی ایک عدالت نے بھانجیوں کے ریپ کے جرم میں سزائے موت سنائی ہے ۔

فیصلے کے بعد گلوکارہ نازیہ اقبال نے راولپنڈی کی عدالت کے باہر سے ایک ویڈیو پیغام اپنی فیس بک پر پوسٹ کرتے ہوئے پشتو میں کہا ہے کہ ’میں نے جو کہا تھا کر دکھایا ہے، میں نے اپنی بیٹیوں کے ساتھ ظلم کرنے والے اپنے بھائی کو سزا دلوا دی ہے۔‘

نازیہ اقبال نے بدھ کو ایک الگ ویڈیو پیغام میں اپنے گھر سے پوسٹ کرتے ہوئے کہا کہ ’میں اللہ کا شکر ادا کرتی ہوں کہ مجھے انصاف مل گیا ہے۔‘ انہوں نے کہا کہ مجرم سے جرمانہ وصول کرنا میرا مقصد کبھی نہ تھا بلکہ اس کی سزا دلوانا تھی ۔

گزشتہ برس نازیہ اقبال نے اپنی بیٹیوں کے ریپ کے الزام میں اپنے سگے بھائی افتخار علی کے خلاف تھانہ روات میں مقدمہ درج کرایا تھا ۔

اس مقدمے میں راولپنڈی کے ایڈیشنل ڈسٹرکٹ اینڈ سیشن جج طاہر اسلم نے جرم ثابت ہونے پر ملزم افتخار علی کو سزائے موت اور جرمانے کی سزا کا حکم سنایا ۔ 

گلوکارہ نازیہ اقبال گزشتہ کئی سالوں سے اپنے چھ بچوں کے ہمراہ راولپنڈی میں مقیم ہیں۔