ادویات کے بڑے کاروباری قانون سے بالاتر؟

Reading Time: < 1 minute

پاکستان کے صوبہ پنجاب کے شہر راولپنڈی میں ادویات کے ایک بڑے گودام پر چھاپے کی ویڈیو سوشل میڈیا پر وائرل ہونے کے بعد صارفین کے ردعمل آنے کا سلسلہ ابھی جاری ہے تاہم اسلام آباد کے ڈپٹی کمشنر نے ایک وضاحتی بیان بھی جاری کر دیا ہے۔

ویڈیو میں محکمہ کسٹم کے اہلکار ادویات کے گودام کو شاہین فارما کی ملکیت قرار دے رہے ہیں جہاں امریکی سپلیمنٹ کی خالی بوتلیں اور پلاسٹک پیکنگ میں وٹامن کی گولیاں دکھائی گئی ہیں۔

شاہین کیمسٹ نے ایک وضاحتی بیان میں کہا ہے کہ وہ اپنے کاروبار کے خلاف پروپیگنڈا کرنے اور بدنام کرنے والوں کے خلاف عدالت سے رجوع کریں گے۔

We clarify that at the moment we have not found any fake medicine in Islamabad. The video that went viral is of a godown in Pindi. The stores in Islamabad are being sealed for absence of import docs/sales invoices. As soon as docs are presented the shops will be desealed.

— Office of Deputy Commissioner Islamabad (@dcislamabad) November 24, 2019

ادھر سوشل میڈیا صارفین کا ردعمل سامنے آنے کے بعد اسلام آباد کے ڈپٹی کمشنر حمزہ شفقات نے جاری کیے گئے بیان میں کہا ہے کہ جعلی ادویات فروخت نہیں ہو رہیں اور کسٹم حکام نے بیرون ملک سے منگوائے سامان کی جانچ پڑتال کے لیے گودام پر چھاپہ مارا جبکہ ادویات کے معیار کو دیکھنے کے لیے ڈریپ اتھارٹی اپنا کام کر رہی ہے۔

ڈپٹی کمشنر کے وضاحتی بیان میں کہا گیا ہے کہ اسلام آباد میں ادویات کے بڑے سٹورز قانون کی خلاف ورزی پر بند کیے گئے تاہم وہاں سے جعلی ادویات نہیں ملیں۔

ڈپٹی کمشنر کے مطابق ادویات کے سٹور کے پاس امپورٹ کی دستاویزات اور فروخت کی رسیدیں نہ ہونے پر کارروائی کی گئی۔