انڈیا : ہسپتال میں آگ لگنے سے کورونا کے 10 مریض ہلاک
Reading Time: < 1 minuteانڈیا کی ریاست مہاراشٹر کے ایک ہسپتال میں کورونا کے مریضوں کے لیے مختص وارڈ میں آگ لگنے سے 10 افراد ہلاک جبکہ دیگر مریض شدید زخمی ہوگئے ہیں۔
انڈین ذرائع ابلاغ کی رپورٹس کے مطابق کورونا وائرس کے مریضوں کے مختص وارڈ میں 17 مریض موجود تھے۔
ڈاکٹر راجندر بھوسلے نے صحافیوں کو بتایا کہ بچ جانے والے مریضوں کو کورونا کے مریضوں کے لیے مختص دوسرے وارڈ میں منتقل کردیا گیا۔
آگ کو چند گھنٹوں میں بجھا دیا گیا ہے تاہم اس کے بھڑکنے کی وجہ معلوم نہ ہوسکی۔ حکام نے کہا ہے کہ واقعے کی انکوائری کی جائے گی۔
نیشنلسٹ کانگریس پارٹی کے رہنما سنگرام جگتاپ نے واقعے پر افسوس کا اظہار کرتے ہوئے ذمہ داروں کو سزا دینے کا مطالبہ کیا۔
انہوں نے متاثرین کے خاندانوں کے لیے معاوضے کا بھی مطالبہ کیا۔
ان کا کہنا تھا کہ ’آج احمد نگر کے سول ہسپتال میں آگی لگی تھی۔ متعدد افراد جان سے ہاتھ دھو بیٹھے۔ یقینی طور پر انکوائری ہوگی تاہم یہ انکوائری سرکاری کمیٹی سے ہو نہ کہ ضلعے کی سطح پر کمیٹی سے۔ ہمیں یہ ضرور معلوم کرنا چاہیے کہ آگ کیسے بھڑک اٹھی اور کون اس کا ذمہ دار ہے۔‘
