شیخ رشید کس کی تحویل میں؟ عدالت کی راولپنڈی پولیس چیف کو وارننگ

شیخ رشید اور ساتھیوں کی غیر قانونی گرفتاری کے خلاف دائر درخواست پر سماعت کرتے ہوئے لاہور ہائیکورٹ نے راولپنڈی پولیس کے سربراہ کو قانونی نتائج سے خبردار کیا ہے۔

منگل کو لاہور ہائی کورٹ کے راولپنڈی بینچ میں جسٹس صداقت علی خان نے درخواست کی سماعت کی۔

عدالتی حکم پر راولپنڈی پولیس کے سربراہ سید خرم علی پیش ہوئے۔

عدالت نے پوچھا کہ ایک ہفتے کا وقت مانگا گیا تھا، شیخ رشید کی بازیابی کے حوالے سے کیا پیش رفت ہے؟

شہر کے پولیس چیف نے استدعا کی کہ مزید ایک ہفتے کا وقت دے دیں، معاملہ کو دیکھ لیتا ہوں۔

وکیل سردار عبدالرازق نے عدالت کو بتایا کہ شیخ رشید کے ساتھ دو ایسے افراد بھی گرفتار کر رکھے ہیں جن کا سیاست سے تعلق نہیں۔

وکیل نے دعویٰ کیا کہ پولیس فیملی سے رابطہ کر رہی ہے کہ رٹ واپس لیں، اور بیان دیں کہ بندے خود گئے تھے تو دونوں کو چھوڑ دیتے ہیں۔

وکیل سردار عبدالرازق نے کہا کہ عدالت نجی ہاوسنگ سوسائٹی کے سی سی ٹی وی کیمروں کی فوٹیج اور پولیس افسران کا سی ڈی آر منگوا لے۔

وکیل سردار رازق کے مطابق شیخ رشید کی گرفتاری کے لیے ایس ایس پی آپریشنز، 4 ایس ایچ اوز، ایک ڈی ایس پی گئے تھے اور اس کے عینی شاہدین موجود ہیں۔

وکیل سردار رازق نے استدعا کی کہ عدالت سیکرٹری داخلہ کو آئندہ سماعت پر طلب کرے۔

جسٹس صداقت علی نے کہا کہ عدالت کسی کو طلب نہیں کرے گی، آر پی او راولپنڈی ہی تلاش کرکے لائیں گے۔

انہوں نے پولیس چیف سے پوچھا کہ آپ بیان حلفی دیتے ہیں کہ شیخ رشید آپ کے پاس راولپنڈی میں موجود نہیں؟
اگر شیخ رشید کل راولپنڈی سے نکل آیا تو آپ کے بیان حلفی پر کارروائی ہو گی۔اگلی تاریخ کا انتظار نہیں کرنا،مغویان کو تاریخ سے پہلے تلاش کرکے بازیاب کریں.

عدالت نے 2 اکتوبر تک سماعت ملتوی کر دی۔