عمران خان کا دی اکانومسٹ میں مضمون، حکومت کی جریدے پر سخت تنقید

Reading Time: 2 minutes

پاکستان کی نگراں حکومت نے برطانوی جریدے دی اکانومسٹ کو عمران خان کا مضمون شائع کرنے پر سخت تنقید کا نشانہ بنایا ہے۔

عمران خان نے مشہور بین الاقوامی جریدے میں شائع اپنے مضمون پر ملک میں ہونے والے اگلے عام انتخابات کی ساکھ پر سوال اٹھائے تھے۔

جمعے کو نگراں حکومت نے برطانوی جریدے دی اکانومسٹ میں سابق وزیراعظم عمران خان کے آرٹیکل کے شائع کیے جانے پر ایڈیٹر سے رابطے کا فیصلہ کیا۔

نگراں وزیر اطلاعات مرتضیٰ سولنگی نے ایک بیان میں کہا کہ ’آج، ہم دی اکانومسٹ کے ایڈیٹر کو عمران خان کے ایک مبینہ مضمون کے بارے میں لکھ رہے ہیں جو شائع کیا گیا۔ یہ بات حیران کن اور پریشان کن ہے کہ ایسے نمایاں میڈیا نے ایک ایسے فرد کے نام سے مضمون شائع کیا جو جیل میں ہے اور اسے سزا ہو چکی ہے۔‘

مرتضیٰ سولنگی نے کہا کہ اخلاقی معیارات کو برقرار رکھنا اور ذمہ دارانہ صحافت کو فروغ دینا انتہائی ضروری ہے۔

نگراں وزیر اطلاعات کا کہنا تھا کہ ’ہم جاننا چاہیں گے کہ دی اکانومسٹ کی جانب سے مضمون کی اشاعت کے حوالے سے ادارتی فیصلہ کیسے کیا گیا۔‘

ان کا کہنا تھا کہ شائع کیے گئے مواد کی قانونی حیثیت اور اعتبار کے لیے کن باتوں کو مدنظر رکھا گیا۔ کیا اکانومسٹ نے دنیا کے کسی اور حصے سے جیل میں بند سیاستدانوں کے گھوسٹ آرٹیکل شائع کیے ہیں؟

مرتضیٰ سولنگی نے کہا کہ ’اگر جیل میں قید مجرم میڈیا کو لکھنے کے لیے آزاد ہوتے تو وہ اپنی یکطرفہ شکایات کو نشر کرنے کے لیے ہمیشہ اس موقع کا استعمال کرتے۔‘

جمعرات کو بین الاقوامی جریدے نے سابق پاکستانی وزیراعظم کا مضمون شائع کیا تھا جس میں عمران خان نے اگلے عام انتخابات کے حوالے سے اپنے تحفظات ظاہر کیے۔

انہوں نے لکھا کہ پاکستان میں اس وقت الیکشن کمیشن آزاد نہیں اور عام انتخابات ایک مذاق ہو سکتے ہیں۔