انڈین فوج کے حملوں میں زخمی دو اہلکار چل بسے: پاکستانی افواج

پاکستان کی فوج کے شعبہ تعلقات عامہ (آئی ایس پی آر) نے ایک بیان میں کہا ہے کہ ’انڈین فوج کی بزدلانہ جارحیت کے نتیجے میں زخمی ہونے والے دو اہلکار چل بسے۔ پاکستان کی فوج کے شہداء کی مجموعی تعداد 13 ہو گئی ہے۔‘

آئی ایس پی آر کی جانب سے جاری بیان میں کہا گیا ہے کہ 78 جوان دوران ڈیوٹی زخمی ہوئے۔ ’شہدا کی عظیم قربانی ان کی جرأت، فرض شناسی، بےمثال حب الوطنی کی لازوال مثال ہے۔ زخمی ہونے والے تمام جوانوں کی جلد اور مکمل صحتیابی کے لیے دعاگو ہیں۔‘

بیان کے مطابق پاکستان کی مسلح افواج شہداء کے اہل خانہ سے تعزیت کا اظہار کرتی ہے۔ ’پاکستان کی مسلح افواج پوری قوم کے ساتھ مل کر ان شہداء کو خراج عقیدت پیش کرتی ہے۔ شہداء کی قربانی قوم کی یادوں میں ہمیشہ زندہ رہے گی اور آنے والی نسلوں کے لیے باعثِ فخر بنے گی۔