’جنرل باجوہ کی ملازمت میں توسیع کے خلاف یوم سیاہ‘
Reading Time: 1 minuteپاکستان میں وکیلوں کی سب سے بڑی تنظیم پاکستان بار کونسل نے حکومت کی جانب سے ملک کے فوجی سربراہ کو مدت ملازمت میں توسیع دینے کے فیصلے کے خلاف 28 نومبر کو یوم سیاہ منانے کا فیصلہ کیا ہے۔
پاکستان بار کونسل کی ایگزیکٹیو کمیٹی کے اجلاس کے بعد جاری کیے جانے والے ایک بیان میں کہا گیا ہے کہ فوج کے سربراہ جنرل قمر جاوید باجوہ کو ملازمت کی مدت میں توسیع کے حکومتی فیصلے کے خلاف قرارداد منظور کی گئی۔
قرارداد میں کہا گیا ہے کہ جوائنٹ ایکشن کمیٹی نے ملک کے قانون سے متعلق طبقے نے آرمی چیف کی مدت ملازمت میں توسیع کی مخالفت کی ہے۔
پاکستان بار کونسل نے اپنے بیان میں کہا ہے کہ ’حکومتی فیصلے کے خلاف 28 نومبر کو ملک بھر میں وکلا یوم سیاہ منائیں گے اور پورا دن ہڑتال کی جائے گی۔‘
بیان کے مطابق ’اس غیر ضروری اور غیر منصفانہ فیصلے کے خلاف وکلا یوم سیاہ کے دن بازوؤں پر کالی پٹیاں باندھیں گے اور بار رومز میں احتجاجی اجلاس منعقد کریں گے۔‘
پاکستان میں تحریک انصاف کی حکومت نے ملک کی فوج کے سربراہ جنرل قمر جاوید باجوہ کو مدت ملازمت میں تین سال کی توسیع دینے کا اعلان کیا ہے۔
جنرل قمر جاوید باجوہ کو سابق وزیراعظم نواز شریف نے نومبر سنہ 2016 میں آئین کے تحت تین سال کے لیے آرمی چیف مقرر کیا تھا جن کی مدت سات دن بعد ختم ہو رہی ہے۔
